केही मुक्तक--केही झट्का !!

१

भाँडहरु यता नाच्ने, उता आदेशको कमान छ ।
काम हैन ठूलो स्वर गर्ने मात्रै यहाँ महान छ ।
शिवरात्री जस्तै भा'छ देशको राजनीति अचेल,
जो जत्ति नाङ्गियो, उसको उत्ति नै सम्मान छ ।

२

दाँत फुक्लेकोलाई कसार छ जिन्दगी ।
छत नहुलेलाई असार छ जिन्दगी ।
कतै मधुमेहलाई लालमोहन त,
कतै टन्सील माथि अचार छ जिन्दगी ।

३

नयाँ सम्बाददाताले सम्पादकलाई भने
"दलका नेताको बैठक बस्दै छ रे !"
अभ्यस्त सम्पादकले समाचार बनाए
"बिना निष्कर्ष वार्ता टुङ्ग्यो अ रे !"

४

केशलाई तिम्रो बादल भन्छन् तिम्लाई देख्ने कविहरू,
लाग्छ तिमी ढल्कि दिँदा वर्षात हुन सक्छ ।
निस्पट्ट अँध्यारो छ, सोध्न बाध्य भएँ म नि,
के तिमीले मुण्डन गर्दा प्रभात हुन सक्छ ?

...र अन्तमा यो पनि

ऊ भन्दैथ्यो उसको देश बिगारेरे दुस्मन ले ।
म सोच्दैथे सायद उस्काँ मेरा जस्ता नेता छैनन् ।