चीन यात्राका केही दृश्यहरू !

कामको सिलसिलामा केही दिन देखि चीनमा छु र त्यसैको कारणले ब्लग पनि अपडेट गर्न भ्याएको छैन ।

त्यसो त चीनको विकासको गति देखेर विदेशीहरू मात्रै हैन, स्वयं चीनियाँ जनताहरू पनि आफैँ छक्क पर्ने गर्छन् र केही चीनियाँहरू विकासको यो गतिलाई ‘आश्चर्य’ भनि भन्ने गर्छन् । आर्थिक सुधार र भौतिक विकासका कारण एउटा शक्तिशाली राष्ट्रको लहरमा उभिन सफल चीनको विकासको मुक्त कण्ठले प्रशंसा गर्नै पर्छ । केही वर्षको फरकमा मात्रै हैन् केही महिनाको अन्तराल पछि आउँदा पनि केही न केही सुधार वा परिवर्तन देखिन्छ यहाँ ।

यसपाला काठमाण्डौबाट छङ्गतुको लागि उड्ने बेलामा मेरो सिटको छेउमा एकजना अधवैसे अमेरिकन महिला थिइन् । उनि आफ्नो चीनमा पढ्दै गरेको छोरालाई भेट्ने बहानामा नेपाल घुमेर चीन जाँदै थिइन् । उडानको क्रममा भलाकुसारी गर्दा तीनले मलाई “तिमी अमेरिका गएका छौ ?” भनेर सोधिन । मैले आफू अमेरिका नगएको तर त्यहाँको तामझाम र चहल-पहलको बारेमा भने निक्कै सुनेको बताएँ । त्यसपछि उनले मलाई चीनको कुन कुन सहरमा गएको छ भनेर सोधिन। मैले उनलाई आफू पुगेको केही सहरहरूको नाम बताएपछि उनले मलाई भनिन ‘तिमी ती सहरहरूमा गएका छौ भने अमेरिका जानु पर्दैन... “ आफूलाई फ्लोरिडाको बताउने ती महिलाले भनिन् “...अब चीनको सहरलाई अमेरिकी सहर सँग हैन, अमेरिकाका नगरहरूलाई चिनियाँ सहरहरू सँग दाँज्ने बेला भइसकेको छ ”

म आफैँ यूरोप वा अमेरिकी सहरहरूमा नपुगेकोले त्यहाँ के कस्तो छ भन्ने मलाई थाहा छैन्, तर मैले देखेको चीन भने तलको तस्विरमा भएको जस्तै छ । क्यामरा नबोक्ने पुरानो बानी र प्राय: जसो तस्विर गाडी भित्रबाट खिचाएकाले फोटोको गुणस्तर कमसल छ, तर चीन भने कम्तिमा पनि यो फोटोहरूमा भन्दा राम्रो भने पक्कै छ:

(छङ्गतु सहरका गगनचुम्बी घरहरू)

(सहर बाहिरको एक दृश्य-- आधुनिकता सँगै प्राकृतिक सुन्दरताको संयोग)

(सिआनको रात्रि दृश्य- प्रविधी र परम्पराको बेजोड फ्यूजन)

(भौतिक पूर्वाधारको एउटा नमूना -- हपेइ-थेनचिनको हाइवे)

(एउटा पारम्परिक चिनियाँ नगर द्वार)

(थेनचीनको सहरी सडक)

(र बाटो छेउको यो संरचना... )

बाँकी पछि !